Hateguwe iserukiramuco rizamara iminsi 41 mu turere dukora ku kiyaga cya Kivu

Hagiye kuba iserukiramuco rifite umwihariko w’imurikabikorwa, rizamara iminsi 41 rikazabera mu turere twose dukora ku mwaro w’Ikiyaga cya Kivu turimo: Rubavu, Rutsiro, Karongi, Nyamasheke na Rusizi.

Ni iserukiramuco ryateguwe na Yirunga Ltd ku bufatanye n’Intara y’Iburengerazuba.

Itangazo ryashyizwe hanze na Yirunga Ltd rivuga ko rizaba mu rwego rwo guteza imbere umuco n’ubukerarugendo bushingiye ku Kiyaga cya Kivu no kugaragaza ibikorerwa mu ntara y’Iburengerazuba.

Riti “By’umwihariko ibikomoka ku buhinzi n’ubworozi, inganda, ubucuruzi, ubukerarugendo n’ibigo bitanga serivise zitandukanye.”

Rikomeza rivuga ko binyuze mu iserukiramuco rya Kivu Beach Expo&Festival buri munsi abitabiriye bazataramirwa n’abahanzi bagezweho babasusurutsa muri buri Karere.

Iri tangazo rigaragaza ko iserukiramuco rizatangirira mu Karere ka Rubavu kuva tariki ya 3 kugeza 12 Nyakanga 2025 kuri ‘Public Beach’.

Rizakomereza mu Karere ka Rutsiro kuva tariki ya 15 kugeza 20 Nyakanga muri Boneza.

Nyuma hazakurikiraho mu Karere ka Karongi kuva tariki ya 22 kugeza tariki ya 27.

Mu Karere ka Rusizi ho rizageza tariki ya 17 Kanama 2025 ku isoko ryaRusizi.

Iri serukiramuco rizasorezwa mu Karere ka Nyamasheke kuva tariki ya 20 kugeza 31 ku isoko rya Tyazo no ku mucanga wa Ishara.

Yves Iyaremye, Umuyobozi mukuru wa Yirunga Ltd yateguye iki gikorwa yabwiye UMUSEKE ko kuri iyi nshuri bafite udushya twinshi ugereranyije n’umwaka washize.

Agira ati:” Twagize umwanya mwiza wo kwigira kuri Kivu Beach EXPO& Festival yabaye umwaka ushize,twateguye mu gihe kiza cy’impeshyi harimo iminsi myinshi y’ikiruhuko.”

Yakomeje agira ati:“Dufasha abantu bose kuryoherwa, twariteguye urebye, twaganiriye n’abafatanyabikorwa batandukanye ku buryo buri wese kuzitabira iyi minsi azabona ibyo akeneye byose byamufasha kwishima.”

Ashima buri Turere ku ruhare dukomeje kugira mu kunoza imyiteguro aho buri Karere kazaba gafite umwihariko ugendeye ku bihari.

Abazitabira iri serukiramuco bazabona ibikorwa bizabera ku mucanga birimo imikino itandukanye, kuzamura impano n’amarushanwa muri buri karere ahazaba habera iserukiramuco n’imurikagurisha.